دیجیٹل میدان میں اسلامی علوم کی عدم موجودگی ا رو اسباب و نتائج
دیجیٹل میدان میں اسلامی علوم کی عدم موجودگی ا رو اسباب و نتائج
دوسری قسط:
ڈیجیٹل اور AI کےدور میں ڈیجیٹل پلیٹ فارم پر اسلامی علوم کی عدم دستیابی محض ایک اتفاقی یا وقتی مسئلہ نہیں، بلکہ یہ ایک گہرے علمی اور فکری خلا کی علامت ہے۔ یہ خلا اس وقت مزید نمایاں ہو جاتا ہے جب ہم دیکھتے ہیں کہ اسلام سے متعلق سوالات، تشریحات اور فکری مباحث بڑی تعداد میں ایسے پلیٹ فارمز پر ہو رہے ہیں جہاں مستند علمی خزانے کا فقدان ہے۔ اس قسط میں اسی خلا کے اسباب کا سنجیدہ اور تحقیقی جائزہ لیا جا رہا ہے۔
موجودہ تعلیمی نظام اور جدید ابلاغی تقاضے:
اسلامی علوم کی روایت صدیوں سے اساتذہ، متون اور بالمشافہ تعلیم پر قائم رہی ہے، جو اپنی جگہ نہایت مضبوط اور مؤثر نظام تھا۔ تاہم جدید دور میں علم کی ترسیل کے ذرائع یکسر بدل چکے ہیں، جہاں تحریر، ویڈیوز اور ڈیجیٹل مواد مرکزی حیثیت اختیار کر چکے ہیں۔ اس تبدیلی کو بروقت قبول نہ کرنے کی وجہ سے اسلامی علوم جدید ابلاغی میدان میں پیچھے رہ گئے، حالانکہ علمی سرمایہ وافرمقدار میں موجود تھااور ہے مگر اس کی پیشکش عصرِ حاضر کے مطابق نہ ہو سکی۔
مدارس کےتعلیم میں ڈیجیٹل معلومات کی عدم موجودگی:
مدارس کے نصاب نے بنیادی طور پر دینی علوم کے تحفظ پر توجہ مرکوز رکھی، لیکن ڈیجیٹل اظہار، جدید تحریری اسلوب اور ٹیکنالوجی فہم کو ثانوی حیثیت دی۔ نتیجتاً طلبہ علمی طور پر مضبوط ہونے کے باوجود اپنے علم کو وسیع معاشرے تک منتقل کرنے کی صلاحیت سے محروم رہے۔ یہی وجہ ہے کہ اہلِ علم کی آواز ڈیجیٹل دنیا میں کمزور اور غیر مؤثر محسوس ہوتی ہے، جبکہ کم علمی مگر جدید اسلوب رکھنے والے افراد زیادہ نمایاں ہو جاتے ہیں۔
ڈیجیٹل میڈیا سے متعلق فکری تحفظات:
علمی حلقوں میں ڈیجیٹل میڈیا اور AI کے بارے میں پائے جانے والے شکوک و شبہات اورفکری تحفظات نے بھی اس خلا کو بڑھایا ہے۔ بعض اوقات احتیاط کے نام پر مکمل کنارہ کشی اختیار کر لی جاتی ہے، جس کا نتیجہ یہ نکلتا ہے کہ دعوت اور تعلیم کےمیدان دوسروں کے لیے خالی چھوڑ دیا جاتا ہے۔ تاریخ شاہد ہے کہ جب اہلِ حق نئے ذرائع سے پیچھے ہٹتے ہیں تو اہلِ باطل انہیں پوری قوت سے استعمال کرتے ہیں، اور یہی آج ڈیجیٹل دنیا میں ہو رہا ہے۔
غیر مستند نمائندگی کا بڑھتا ہوا خطرہ:
اسلامی علوم کی ڈیجیٹل عدم موجودگی نے ایک ایسا ماحول پیدا کر دیا ہے جہاں اسلام کی نمائندگی اکثر غیر اہل افراد، سطحی معلومات اور جذباتی نعروں کے ذریعے کی جا رہی ہے۔ عام قاری کے لیے یہ طے کرنا مشکل ہوتا جا رہا ہے کہ کون سا موقف علمی بنیاد رکھتا ہے اور کون سا محض رائے یا قیاس پر مبنی ہے۔ یہ صورتِ حال علمی انتشار اور فکری بے سمتی اور گہرے شکوک و شبہات کو جنم دے رہی ہے، جو مستقبل میں مزید گہرے مسائل پیدا کر سکتی ہے۔
AI اور فکری رہنمائی کا نیا منظرنامہ:
مصنوعی ذہانت(Ai) آج صرف سوالات کے جوابات نہیں دے رہاہے بلکہ فکری ترجیحات بھی تشکیل دے رہا ہے۔ اگر اسلامی علوم اس نظام کو مستند علمی مواد فراہم نہ کریں تو AI انہی مصادر سے استفادہ کرے گی جو بآسانی دستیاب ہوں، خواہ وہ درست ہوں یاناقص۔ یہ پہلو اہلِ علم کے لیے ایک سنجیدہ لمحۂ فکریہ ہے کہ آیا وہ اس ابھرتی ہوئی فکری قوت کی سمت متعین کریں گے یا خاموشی اختیار کر کے دوسروں کو یہ موقع فراہم کریں گے۔
خلاصۂ کلام:
یہ حقیقت روزِ روشن کی طرح واضح ہے کہ اسلامی علوم اور ڈیجیٹل دنیا کے درمیان موجود خلا تاریخی، تعلیمی اور فکری عوامل کا مجموعہ ہے۔ اس خلا کو پُر کرنا محض ایک انتخاب نہیں بلکہ ایک علمی و دینی ذمہ داری بن چکا ہے۔ اگر اہلِ علم نے اس سمت میں سنجیدہ قدم نہ اٹھایا تو اسلام کی فکری نمائندگی آہستہ آہستہ ان ہاتھوں میں چلی جائے گی جو اس کے اصل مزاج سے ناواقف ہیں۔اور دشمنانان اسلام کیلئے ایک شاندار اور وسیع میدان فراہم ہوگا جس سے اسلام اور اہل اسلام کے خلاف نفرت پھیلاکر پوری نسل نو کے ذہن ودماغ میں پرگندہ کریں گے۔
طارق انور ندوی
کمپیوٹر کورس کیلئے اس لنک پہ کلک کریں، یہاں کمپیوٹر کا پورا کورس بالکل آپ کے اپنے انداز میں موجود ہے۔
https://www.youtube.com/@TariqueForU/playlists